மாதூர் வேளாண் மையத்தில் முயல் வளர்ப்பு பயிற்சி

காரைக்கால்: காரைக்கால் மாதூர் வேளாண் அறிவியல் நிலையத்தில், வான்கோழி, முயல் வளர்ப்பு பயிற்சி தொடங்கியது. நிலைய தலைவர் சுரேஷ் பயிற்சி முகாமை தொடங்கி வைத்து பேசும்போது, மாதூர் வேளாண் அறிவியல் நிலையத்தில், கால்நடை வளர்ப்பு பயிற்சியோடு, வான்கோழி, நாட்டுக்கோழி, முயல், மீன் உள்ளிட்ட பல்வேறு வளர்ப்பு பயிற்சிகள் அளிக்கப்பட்டு வருகிறது. அத்துடன் முயல் விற்பனையும் தொடங்கியுள்ளோம். ஒரு ஜோடி ரூ.300க்கு விற்பனை செய்யப்படுகிறது. முயல் மற்றும் வான்கோழி வளர்க்க ஆர்வமுள்ளவர்கள் நிலையத்தை அணுகலாம். மேலும், விவசாயிகளுக்கு தேவையான நெல் ரகங்கள் உற்பத்தி செய்து விதையாக வழங்கி வருகிறோம். இது தவிர வீட்டிலிருந்தபடியே பல்வேறு உணவு மற்றும் கைவினைப் பொருட்களை தயாரித்தல் போன்ற பயிற்சிகளும் நிலையத்தில் அளிக்கப்படுகிறது. ஆர்வமுள்ள சுய உதவிக்குழுவினர் நிலையத்திற்கு வருகை தந்து பயிற்சி பெற்று பயன் பெறலாம் என்றார். நிலையத்தின் திட்ட ஒருங்கிணைப்பாளர் விஜயக்குமார், கால்நடை தொழில்நுட்ப வல்லுனர் கோபு, விரிவாக்க தொழில் நுட்ப வல்லுநர் வேணுகோபால், பண்ணை மேலாளர் பாலசண்முகம் உள்ளிட்ட பலர் கலந்து கொண்டனர்.

மண்புழு உரம் தயாரிப்பு பயிற்சி

• 
• 

காரைக்கால்: காரைக்காலை அடுத்த மாதூர் வேளாண் அறிவியல் நிலைய மனையியல் பிரிவு சார்பில், சில்பாலின் பைகளில் மண்புழு உரம் தயாரிப்பு குறித்த சிறப்பு பயிற்சி முகாம் விவசாயிகள் மற்றும் சுய உதவிக்குழுவினருக்கு நடத்தப்பட்டது.

 முகாமிற்கு, அறிவியல் நிலைய தலைவர் சுரேஷ் தலைமை வகித்து பேசியதாவது:

"இன்றைய காலகட்டத்தில் ரசாயன உரம் கொண்டு தயாரிக்கப்படும் காய்கறி மற்றும் சாகுபடிகளை தவிர்த்து, இயற்கை உரங்களை பயன்படுத்துவது காலத்தின் கட்டாயம் மட்டுமல்ல எதிர்கால சந்ததியினரின் ஆரோக்கியமான வளர்ச்சிக்கு மிகவும் நல்லது. விவசாயிகளின் வசதிக்காக மண்புழு உரம் நிலைய வளாகத்தில் விற்பனைக்கு வைக்கப்பட்டுள்ளது. அதன்படி மண்புழு கிலோ ரூ.300-க்கும், மண்புழு உரம் ரூ.7-க்கும் விற்கப்பட்டு வருகிறது. விவசாயிகள், சுய உதவிக்குழுவினர் வாங்கி பயன்பெறவேண்டுகிறோம்" என்றார்.

தொடர்ந்து, சில்பாலின் பைகளை கொண்டு மண் புழு உரம் தயாரித்தல், மண்புழு வகைகள், சில் பாலிதீன் பை அமைப்பு, இடம் தேர்வு, தொட்டி அமைக்கும் முறை, தாவரம் மற்றும் விலங்கு கழிவுப்பொருட்களை தேர்வு செய்யும் முறை, மண் புழு உரத்தின் பயன்கள் மற்றும் விற்பனை குறித்து, நிலையத்தின் மனையியல் பிரிவு உதவி தொழில்நுட்ப வல்லுநர் லதா செய்முறை விளக்கத்துடன் செய்து காட்டினார்.

முகாம் ஏற்பாடுகள், நிலையத்தின் முதல்வர் விஜயக்குமார் தலைமையில் சிறப்பாக செய்யப்பட்டிருந்தது.