மாற்றுப் பயிராக மக்காச்சோளம்!

மாற்றுப் பயிராக மக்காச்சோளம்!

விற்பனைக்குக் கைகொடுக்கும் கால்நடைப் பல்கலைக்கழகம்!

த. ஜெயகுமார் படங்கள்: சொ.பாலசுப்ரமணியன், எஸ். நாகராஜ், தி.குமரகுருபரன்

இந்தியாவில் இறைச்சிக்கான தேவை பெருகிக்கொண்டே வருவதால், ஆடு, கோழி என கால்நடைப் பண்ணைகளும் பெருகிக்கொண்டே வருகின்றன. பெரும்பாலான பண்ணைகளில் கொட்டில் முறையில் கால்நடை வளர்ப்பு மேற்கொள்ளப்படுவதால், அடர்தீவனத்துக்கான தேவையும் பெருகிக்கொண்டே வருகிறது. மேய்ச்சல் நிலங்கள் குறைந்து கொண்டே வருவதும் அடர்தீவனத் தேவைக்கு ஒரு காரணம். இத்தகையச் சூழலில், அடர்தீவனத்துக்கான மூலப்பொருட்கள் சாகுபடி மற்றும் விற்பனை ஆகியவை... நல்ல வருமானம் தரும் தொழில்களாக மாறியுள்ளன. குறிப்பாக, மக்காச்சோளத்துக்கு நல்ல விற்பனை வாய்ப்புள்ளது. இதைச் சரியாகப் புரிந்து கொண்ட பலரும் மக்காச்சோள சாகுபடிக்கு மாறி வருகின்றனர்.

பல மாவட்டங்களில் நெல்லுக்கு மாற்றுப்பயிராக மக்காச்சோளத்தை சாகுபடி செய்கிறார்கள். தற்போது, வேளாண் அறிவியல் மையங்களிலும் மக்காச்சோள சாகுபடி பற்றி விழிப்பு உணர்வு ஏற்படுத்தி வருகிறார்கள். காட்டுப்பாக்கம் வேளாண் அறிவியல் மையம் மூலமாக, காஞ்சிபுரம் மாவட்டம் ஸ்ரீபெரும்புதூர் வட்டத்துக்கு உட்பட்ட பட்டுமுடையார்குப்பம் கிராமத்தைச் சேர்ந்த விவசாயிகள் மக்காச்சோள சாகுபடிக்கு மாறி, நல்ல வருமானம் ஈட்டி வருகிறார்கள்.

சென்னை-பெங்களூரு தேசிய நெடுஞ்சாலையில் சவீதா மருத்துவக் கல்லூரியைத் தாண்டியதும், வலதுபுறம் திரும்பினால்...

23 கிலோ மீட்டர் தொலைவில் இருக்கிறது, பேரம்பாக்கம். அங்கிருந்து அரக்கோணம் செல்லும் சாலையில் 5 கிலோ மீட்டர் தூரம் பயணித்தால், பட்டுமுடையார்குப்பம். இந்த கிராமத்தில், நெல், காய்கறிகள், மலர்கள் என விவசாயம் செழிப்பாக நடக்கிறது.

இந்த கிராமத்தைச் சேர்ந்த மனோகரன் என்பவரைச் சந்தித்தோம். ''ரெண்டு வருஷத்துக்கு முன்ன காட்டுப்பாக்கம் கே.வி.கே. (வேளாண் அறிவியல் மையம்) நடத்தின மக்காச்சோள சாகுபடி பயிற்சியில கலந்துக்கிட்டேன். 'குறைஞ்ச தண்ணி, அளவான வேலையாள் இருந்தாலே மக்காச்சோளத்துக்கு போதுமானது’னு தெரிஞ்சுகிட்டேன். நெல் சாகுபடி அளவுக்கு வருமானம் கிடைக்கும்னு தெரிஞ்சதும் மக்காச்சோள சாகுபடி பண்ற ஆசை வந்துடுச்சு. கே.வி.கே. விஞ்ஞானிங்க, எங்க கிராமத்துல மக்காச்சோளத்துக்காக முகாம் நடத்தினாங்க. 50 பேர் கலந்துக்கிட்டோம். ஆனாலும், 4 பேர்தான் பயிர் பண்றதுக்கு ஒப்புக்கிட்டாங்க.

அதுல ஒருத்தனா மூணு ஏக்கர்ல மக்காச்சோளம் போட்டேன். 100 நாள்ல, 5 டன் மகசூல் எடுத்தேன். கிலோ

11 ரூபாய்னு கே.வி.கே. மூலமாவே எடுத்துக்கிட்டாங்க. எல்லா செலவும் போக, 30 ஆயிரம் ரூபா லாபமா நின்னுச்சு. அதுக்கப்பறம் கே.வி.கே. மூலமா 'மக்காச்சோளம் உற்பத்தியாளர் சங்கம்’ ஆரம்பிச்சாங்க. அதுக்கு நான்தான் தலைவர். சங்கம் மூலமா, காஞ்சிபுரம் மாவட்டம் முழுக்க இருக்குற மக்காச்சோள விவசாயிகளுக்கு தொழில்நுட்பம், சந்தைபடுத்தறது பத்தி ஆலோசனைகளைக் கொடுத்துட்டு இருக்கேன். இதுவரைக்கும் மூணு முறை மக்காச்சோளம் சாகுபடி பண்ணியிருக்கேன். நெல்லைவிட, இதுல நல்ல லாபம் கிடைக்கிறது உண்மை'' என்று மக்காச்சோள பெருமை பேசினார். அங்கே கூடியிருந்த மற்ற விவசாயிகளும் அதை ஆமோதித்தனர்.

காட்டுப்பாக்கம், வேளாண் அறிவியல் நிலையத்தின் தலைவர் மற்றும் பேராசிரியர் குமரவேலுவிடம் பேசியபோது, ''மக்காச்சோளம், நடவு துவரை, வணிக ரீதியான மலர்கள், காளான், தேனீ வளர்ப்பு, ஒருங்கிணைந்தப் பண்ணையம்... என மாற்றுப் பயிர்கள், லாபம் ஈட்டக்கூடிய தொழில் வாய்ப்புகள் தரும் பயிற்சிகளை எங்கள் மையத்தில் நடத்தி வருகிறோம். மக்காச்சோளத்துக்கு அதிக தேவையும், விற்பனை வாய்ப்பும் இருப்பதால்... மாற்றுப் பயிர்கள் வரிசையில் இதை முன்னிலைப்படுத்தி வருகிறோம். தவிர, குறைந்த தண்ணீரில், குறைந்த வேலையாட்களைக் கொண்டே சாகுபடி செய்ய முடியும்.

தமிழ்நாடு, கால்நடை மருத்துவ அறிவியல் பல்கலைக்கழகத்தின் கீழ் இயங்கி வரும் மத்திய தீவனத் தொழில்நுட்ப மையத்தின் தீவன அரவை ஆலை, காட்டுப்பாக்கம் வேளாண் நிலையத்தில் அமைந்துள்ளது. இதற்கே, ஒரு நாளைக்கு 4 டன் மக்காச்சோளம் தேவை. பெரும்பாலும், கர்நாடகா, மகாராஷ்டிரா மாநிலங்களிலிருந்துதான் கொள்முதல் செய்வோம். எங்கள் பகுதி விவசாயிகளுக்கு வாய்ப்பு அளிக்கும் நோக்கில்தான், ஒப்பந்த முறையில் சாகுபடி செய்யச் சொல்லி வருகிறோம். புதிதாக  பயிர் செய்பவர்களுக்கு பயிற்சியும்,  தொழில் நுட்ப ஆலோசனையும் வழங்குகிறோம்'' என்ற குமரவேலு,

''எங்களிடம் சேமிப்புக் கிடங்கு இருப்பதால், விவசாயிகள் கொடுக்கும் மக்காச்சோளத்தை உடனடியாகப் பெற்றுக் கொள்வோம். மற்ற மாவட்ட விவசாயிகளும் விற்பனைக்கு எங்களைத் தொடர்பு கொள்ளலாம். சந்தை விலையைவிட 1 ரூபாய், 2 ரூபாய் கூடுதலாகவே கொடுத்து எடுத்துக் கொள்வோம். மாதத்துக்கு ஒருமுறை விலை நிர்ணயம் செய்யப் படும். 

தற்போதைக்கு 1 கிலோ மக்காச் சோளம், 15.50 காசு விலையில் வாங்குகிறோம். மணிகளில் 10 சதவிகிதம் ஈரம் இருக்கு மாறும், பூஞ்சணத் தாக்கு தல் இல்லாமலும், காய  வைத்து கொடுக்க வேண்டும் என்பதை விவசாயிகள் கவனத்தில் கொள்ள வேண்டும்'' என்று சந்தைத் தகவல்களையும் தந்தார்.    

தொடர்புக்கு,
வேளாண் அறிவியல் நிலையம் காட்டுப்பாக்கம்.
தொலைபேசி: 044-27452371,
செல்போன்: 98844-02613
மனோகரன், செல்போன்: 94446-60398
கோதண்டராமன், செல்போன் : 98405-40260
-------------------------------------------------------------------------------------------------------------------------------------------------------------------

இப்படித்தான் சாகுபடி செய்யணும்...

மக்காச்சோளம் சாகுபடி பற்றி மனோகரன் சொல்லும் விஷயங்கள்

'நிலத்தை நன்றாக உழுது, 4 டன் தொழுவுரத்தைக் கொட்டி, பார் ஓட்டி, பாசனம் செய்ய வசதியாக வாய்க்கால்களை அமைக்க வேண்டும். மக்காச்சோள விதையை வரிசைக்கு வரிசை இரண்டடி இடைவெளி, செடிக்குச் செடிக்கு ஓரடி இடைவெளி இருக்குமாறு விதைக்க வேண்டும் (ஏக்கருக்கு 7 கிலோ 200 கிராம் அளவுக்கு விதை தேவைப்படும்). விதைத்த 3ம் நாள் உயிர்தண்ணீர் கொடுக்க வேண்டும். பிறகு, வாரம் ஒரு தண்ணீர் கொடுக்க வேண்டும். 15 முதல் 20 நாட்களுக்குள் களை எடுத்து, பரிந்துரைக்கப்பட்ட உரங்களைக் கொடுக்க வேண்டும். 25 நாட்களுக்கு மேல் செடிகள் வேகமாக வளரும். களைகள் இருந்தால், அவற்றை அகற்ற வேண்டும். விதைத்த 45ம் நாளுக்கு மேல் நுண்ணூட்டச் சத்துக்களை இட வேண்டும். 55ம் நாளுக்கு மேல், ஆண் பூவும் அடுத்து பெண் பூவும் பூக்கும். இது மணிகளில் பால் ஏறும் சமயம் என்பதால், தவறாமல் தண்ணீர் பாய்ச்சி வர வேண்டும். தண்ணீர் செழிம்பாகக் கொடுத்தால்... மணிகள் பெருக்கும். 60ம் நாளில் இருந்து 85ம் நாளுக்குள் கதிர்கள் முதிர்ச்சியடையும். முதிர்ந்த கதிர்களை ஒரு வாரம் வரை செடியிலேயே காயவிட்டு அறுவடை செய்து, இயந்திரத்தின் மூலம் அடித்து, மணிகளைப் பிரித்து 3 நாட்கள் காய வைத்து விற்பனை செய்யலாம்.'

/////////////////////////////////////////////////////////////////////////////////////////////////////////////////////////////////////////////////////////////////////////////////////////////////////////////////////////

தலைச்சேரி... சிரோஹி... போயர்... 4 ஆண்டுகளில் 50 லட்சம்

தலைச்சேரி... சிரோஹி... போயர்... 4 ஆண்டுகளில் 50 லட்சம்...

அள்ளிக் கொடுக்கும் ஆட்டுப்பண்ணை!

ஆசை இருக்கு அரசாள... அதிர்ஷ்டம் இருக்கு ஆடு மேய்க்க’ என்று கிண்டலாகச் சொல்வார்கள். ஆனால், இன்றைக்கு அரசாள்வதைவிட... இது மேல் என்று சொல்லும் அளவுக்கு... மரியாதைக்குரிய மற்றும் லாபம் கொழிக்கும் தொழிலாக மாறிவிட்டது ஆடு மேய்த்தல்!

தமிழகத்தின் பல மாவட்டங்களிலும் அதிகளவில் உருவாகி வரும் ஆட்டுப்பண்ணைகளே அதற்கு சாட்சி! அவர்களில் ஒருவராக... நிறைவான லாபம் பார்த்து வருகிறார், அரியலூர் மாவட்டம், உடையார்பாளையம் பகுதியைச் சேர்ந்த ராஜன். இளங்கலை வணிகவியல் பட்டதாரியான இவர், புகைப்பட நிறுவனத்தையும் நடத்தி வருகிறார்.

கைகொடுத்த மூலிகை வைத்தியம்!

கம்பீரமான தோற்றத்தோடு, 250 ஆடுகளுடன் பிரமாண்டமாக காட்சி அளிக்கிறது, இவரது ஆட்டுப் பண்ணை. ஆடுகளுக்கு பசுந்தீவனம் போட்டுக் கொண்டே நம்மோடு பேச ஆரம்பித்தார், ராஜன்.

''பசுமை விகடனோட தீவிர வாசகர் நான். 2009-ம் வருஷம் நவம்பர் மாசம், ஏழு லட்ச ரூபாய் முதலீடு போட்டு... 86 தலைச்சேரி, 10 போயர், 15 சிரோஹி, 15 தலைச்சேரி-போயர் கலப்பு ஆடுகள்னு மொத்தம் 126 ஆடுகளோட பண்ணையை ஆரம்பிச்சேன். அந்த சமயம் குளிர்காலங்கிறதால, ஆடுகளுக்கு கடுமையான சளித்தொந்தரவால நிமோனியா வந்துடுச்சு. எவ்வளவோ இங்கிலீஷ் மருந்துகள் கொடுத்தும், சரி பண்ண முடியல. 20 ஆடுகள் வரைக்கும் இறந்துடுச்சு. கடைசியா, தஞ்சாவூர், கால்நடை மருத்துவக்கல்லூரி மற்றும் ஆராய்ச்சி மையத்தோட தலைவர், டாக்டர். புண்ணியமூர்த்தி சொன்ன மூலிகை வைத்தியத்தைக் கடைபிடிச்சப்போ... எல்லா ஆடுகளுமே குணமாகி, ஆரோக்கியமா வளர ஆரம்பிச்சுது. அதனால வரப்பு ஓரத்துல எல்லாம்... ஆடு, மாடுகளுக்குத் தேவையான மூலிகைகளையும் வளர்த்து தேவைப்படுறப்போ பயன்படுத்திகிட்டிருக்கோம்.

இயற்கை உரத்தில் தீவன சாகுபடி!

தீவனத்துக்காக 3 ஏக்கர்ல கோ-4, ஒன்றரை ஏக்கர்ல தீவனச் சோளம், ஒன்றரை ஏக்கர்ல வேலிமசால், அரை ஏக்கர்ல அகத்தினு சாகுபடி செய்யுறோம். சொந்தமா பசுந்தீவனம் சாகுபடி செஞ்சு தாராளமா கொடுக்கறதால, ஆடுகளும்... ஊட்டமா, திடகாத்திரமா வளருதுங்க. தீவனச் செலவும் குறையுது. எங்ககிட்ட இருக்கற 15 மாடுகளுக்கும் இதுலயே பசுந்தீவனம் கிடைச்சுடுது. அடர்தீவனத்துக்கு மக்காச்சோளம் அதிகமா தேவைப்படுறதால, 3 ஏக்கர்ல அதையும் போட்டிருக்கோம். தேவைக்குப் போக, மீதியை விற்பனை செஞ்சுடுவோம்.

பத்தரை ஏக்கர்ல நெல், கடலை, எள், வாழைனு இருக்கு. வருஷத்துக்கு ஒரு ஏக்கருக்கு 500 கிலோ ஆட்டு எருவும் ரெண்டரை டன் மாட்டு எருவும் போடுறோம். பசுந்தீவனத்துக்கு எந்த ரசாயன உரமும் கொடுக்குறதில்ல. நெல், மக்காச்சோளம், கடலை மாதிரியான பயிர்களுக்கு மட்டும் கொஞ்சமா யூரியா போடுவோம். அதனால எங்களுக்கு உரச் செலவும் குறைஞ்சுடுது'' என்ற ராஜன், தொடர்ந்தார்.

பாதுகாப்பான பரண்!

''தரையில் இருந்து நாலரை அடி உயரத்துல ஆஸ்பெஸ்டாஸ் கூரை போட்டு, பரண் அமைச்சுருக்கேன். தாராளமா காத்தோட்டம் கிடைக்கிற மாதிரி அமைச்சுருக்கறதால, உள்ள வெக்கை இருக்காது. 220 அடி நீளம், 21 அடி அகலத்தில் கொட்டகை இருக்கு. இதை 13 பாகமா பிரிச்சுருக்கேன். ஒரு பாகத்துல பெரிய ஆடுகள் 20 வரைக்கும் அடைக்கலாம். குட்டிகளா இருந்தா, 30 வரை அடைக்கலாம். கழிவுகள் கீழ விழுற மாதிரி கொட்டகையோட தரைப்பகுதியில இடைவெளி விட்டிருக்கேன். பரணுக்கு கீழே சேகரமாகுற கழிவுகளை வாரத்துக்கு ஒரு தடவை அள்ளிடுவோம்.  

4 கிலோ பசுந்தீவனம்... அரை கிலோ அடர்தீவனம்!

கோ-4-ல 40%, வேலிமசால்ல 20%, தீவனச்சோளத்துல 25%, அகத்தியில 10%, கிளரிசீடியா, சூபாபுல், கல்யாணமுருங்கை ஒவ்வொண்ணுலயும் 5% னு எடுத்து, மொத்தமா கலந்து... அதுல ஒரு பெரிய ஆட்டுக்கு தினம் 4 கிலோ அளவுக்குக் கொடுக்குறோம். இதை மூணு வேளையா பிரிச்சு கொடுப்போம். குட்டிக்கு ஒண்ணரை கிலோ அளவுக்குக் கொடுக்குறோம். இதுபோக, தினமும் மதியம் ஒரு மணியளவுல அடர்தீவனம் கொடுப்போம். குருணையா உடைச்ச மக்காசோளம் 40%, கோதுமைத் தவிடு 10%, நெல் தவிடு 21%, கடலைப் புண்ணாக்கு 15%, சோளமாவு 10%, தாது உப்பு 3%, சாதாரண கல் உப்பு 1% இந்த விகிதத்துல கலந்து, இதுல பெரிய ஆடுகளுக்கு ஒரு நாளைக்கு 500 கிராம் வரைக்கும், குட்டிகளுக்கு 200 கிராம் வரைக்கும் கொடுக்குறோம்'' என்ற ராஜன் மற்ற பராமரிப்பு முறைகளையும் சொன்னார்.

காலந்தவறாமல் தடுப்பூசி!

''15 நாளைக்கு ஒரு தடவை பரணை சுத்தமா கூட்டி விட்டுடுவோம். தினமும் காலையில, சாயங்காலம் ஆடுகளை வெயில்ல கொஞ்ச நேரம் நிறுத்துவோம். வருஷத்துக்கு ரெண்டு தடவை, துள்ளுமாரி நோய், அம்மை நோய்களுக்கான தடுப்பு ஊசி போட்டுடுவோம். மூணு மாசத்துக்கு ஒரு தடவை குடற்புழு நீக்க மருந்து தருவோம். பனிக் காலத்துல கொட்டகையை சுத்தி நாலு பக்கமும் பாலிதீன் படுதா கட்டி, குளிரைக் கட்டுப்படுத்துவோம். நோய் அறிகுறி ஏதும் தெரிஞ்சாலே, அதுக்கான மூலிகை வைத்தியத்தை உடனே செஞ்சுடுவோம்.

ராத்திரி நேரத்துல வேப்பங்கொட்டையை உடைச்சி, நெருப்புல போட்டு, ஆடுகள் இருக்கற பகுதியில புகை உண்டாக்குவோம். அதனால, ஆடுகளுக்கு கதகதப்பா இருக்குறதோட, ஈ, கொசு இதெல்லாம் அண்டாம இருக்கும். கொட்டகையை சுத்தி பயிர் பண்றதால வெயில் காலங்கள்ல வெக்கையும் தணிஞ்சுடும்.

20 பெட்டைக்கு ஒரு கிடானு சேர்த்து விடுவோம். ஒரு ஆடு, ரெண்டு வருஷத்துல, மூணு தடவை குட்டி போடும். இதன் மூலமா ஆறு குட்டிகள் கிடைக்கும். சராசரியா ரெண்டு வருஷத்துல அஞ்சு குட்டி கிடைச்சுடும்.

கிலோ 300 ரூபாய்!

கிடா குட்டிகளை அஞ்சு மாசத்துல இருந்து ஆறு மாச வயசுல வித்துடுவோம். தலைச்சேரி கிடாவும் சிரோஹி கிடாவும் இந்த வயசுல 15 கிலோ வரை வந்துடும். தலைச்சேரி-போயர் கலப்பினக் கிடா... ஆறு மாசத்துல 20 கிலோ வரை வந்துடும். கிடா ஆடுகளை பெரும்பாலும் இறைச்சிக்காகதான் வாங்குவாங்க. ஒரு கிலோ உயிர் எடை 225 ரூபாய்னு விப்போம். பெட்டை ஆடுகளை வளர்ப்புக்காக வாங்கிட்டுப் போவாங்க. அதனால, ஆறு மாச வயசுல இருந்து பத்து மாச வயசு வரைக்கும் வளர்த்து விப்போம். வளர்பபு ஆடுகள்ங்கறதால, உயிர் எடை ஒரு கிலோவுக்கு 300 ரூபாய் விலை கிடைக்கிது. போயர் ரகத்துல, கிடா, பெட்டை இரண்டையுமே வளர்ப்புக்காகத்தான் வாங்கிக்கிட்டு போவாங்க. இதுல கிடா, உயிர் எடையில ஒரு கிலோ ஆயிரம் ரூபாய் வரை விலை போகும். பெட்டை, 1,500 ரூபாய்க்கு விலை போகும். ஆனா, அதிகமா விலை கிடைக்குதேனு அதிக எண்ணிக்கையில வளர்த்துடக் கூடாது. இதை வாங்குறவங்க ரொம்ப குறைவு'' என்று எச்சரிக்கையும் தந்த ராஜன், நிறைவாக...

4 ஆண்டுகள்... ஆயிரம் ஆடுகள்!

''இந்த நாலு வருஷத்துல எல்லா ரகங்களும் சேர்த்து கிட்டத்தட்ட ஆயிரம் ஆடுகள் வரை பெருகியிருக்கு. இதுவரைக்கும்

850 ஆடுகளை, 51 லட்ச ரூபாய்க்கு வித்துருக்கோம். தீவனம், ஆள் சம்பளம், மருத்துவம், மின்சாரம், பராமரிப்புனு செலவெல்லாம் போக... 30 லட்சம் ரூபாய் நிகர லாபமா கிடைச்சுருக்கு. 250 ஆடுகள் கொட்டகைகள்ல நின்னுக்கிட்டு இருக்கு.

பண்ணைக்குப் போக மீதி இருக்குற ஆட்டு எருவை ஒரு டன் 2 ஆயிரத்து 500 ரூபாய்னு விக்கிறோம். வருஷத்துக்கு 20 டன் வரைக்கும், விக்கிறோம். இதுலயும் கணிசமான வருமானம் கிடைக்குது. எல்லாத்தையும் கணக்குப் போட்டுப் பார்த்தா... இதைவிட பெருசா வேற லாபம் என்ன வேண்டிக்கிடக்குனுதான் எனக்கு கேக்க தோணும்'' என்று புன்னகைத்தார்!

தொடர்புக்கு,
ராஜன்,
செல்போன்: 99420-64180.